കിരീട സ്വപ്നങ്ങളില്‍ വേങ്ങര

Posted on: 06 Dec 2012

വണ്ടൂര്‍: ജില്ലാ സ്‌കൂള്‍ കലോത്സവത്തില്‍ ഹൈസ്‌കൂള്‍ വിഭാഗത്തില്‍ 223 പോയന്റുമായി വേങ്ങര മുന്നില്‍ കുതിക്കുമ്പോള്‍ 210 പോയന്റുമായി മലപ്പുറം പോരാട്ടവീഥിയില്‍ പിന്നാലെയുണ്ട്. 176 പോയന്റുമായി ആതിഥേയരായ വണ്ടൂരാണ് മൂന്നാംസ്ഥാനത്ത്. ഹയര്‍സെക്കന്‍ഡറി വിഭാഗത്തില്‍ 215 പോയന്റുമായി മലപ്പുറം മുന്നില്‍ കുതിക്കുമ്പോള്‍ 204 പോയന്റാണ് വേങ്ങരയുടെ സമ്പാദ്യം. 201 പോയന്റുമായി എടപ്പാള്‍ മൂന്നാം സ്ഥാനത്തുണ്ട്. യു.പി വിഭാഗത്തില്‍ 78 പോയന്റുമായി മഞ്ചേരിയാണ് മുന്നിട്ടുനില്‍ക്കുന്നത്. 77 പോയന്റുള്ള വേങ്ങര രണ്ടാമത് നില്‍ക്കുമ്പോള്‍ 71 പോയന്റുള്ള തിരൂരാണ് മൂന്നാംസ്ഥാനത്ത്.
സംസ്‌കൃതോത്സവത്തില്‍ പരപ്പനങ്ങാടി ഓവറോള്‍ ചാമ്പ്യന്‍മാരായി. ഹൈസ്‌കൂള്‍ വിഭാഗത്തില്‍ 89 പോയന്റ് പരപ്പനങ്ങാടി സ്വന്തമാക്കിയപ്പോള്‍ 84 പോയന്റുമായി മങ്കട രണ്ടാമതെത്തി. 83 പോയന്റുമായി വേങ്ങരയാണ് മൂന്നാംസ്ഥാനത്ത്. യു.പി വിഭാഗത്തില്‍ 82 പോയന്റുമായാണ് പരപ്പനങ്ങാടി ചാമ്പ്യന്‍മാരായത്. 81 പോയന്റുമായി മേലാറ്റൂര്‍ രണ്ടാം സ്ഥാനത്തെത്തിയപ്പോള്‍ 80 പോയന്റുമായി വണ്ടൂരും പെരിന്തല്‍മണ്ണയും മൂന്നാമതെത്തി. അറബിക് കലോത്സവത്തില്‍ വണ്ടൂരും അരീക്കോടും ഒപ്പത്തിനൊപ്പമുള്ള പോരാട്ടം തുടരുകയാണ്. ഇരുവര്‍ക്കും 86 പോയന്റുള്ളപ്പോള്‍ 82 പോയന്റുമായി കൊണ്ടോട്ടിയും വേങ്ങരയും തൊട്ടുപിന്നിലുണ്ട്.
ഹയര്‍സെക്കന്‍ഡറി വിഭാഗത്തില്‍ 70 പോയന്റ് വാരിക്കൂട്ടി എടരിക്കോട് പി.കെ.എം.എം ഹയര്‍സെക്കന്‍ഡറി സ്‌കൂളാണ് മുന്നില്‍നില്‍ക്കുന്നത്. 60 പോയന്റുമായി മഞ്ചേരി ജി.ബി.എച്ച്.എസ്.എസ് രണ്ടാം സ്ഥാനത്ത് നില്‍ക്കുമ്പോള്‍ 53 പോയന്റുമായി തൃക്കാവ് ഗവ. എച്ച്.എസ്.എസ്സാണ് മൂന്നാമതുള്ളത്. ഹൈസ്‌കൂള്‍ വിഭാഗത്തിലും എടരിക്കോട് പി.കെ.എം.എം.ഹയര്‍ സെക്കന്‍ഡറി സ്‌കൂളാണ് മുന്നില്‍ നില്‍ക്കുന്നത്. 86 പോയന്റ് എടരിക്കോടിനുള്ളപ്പോള്‍ തേഞ്ഞിപ്പലം സെന്റ്‌പോള്‍സ് 59 പോയന്റുമായി രണ്ടാംസ്ഥാനത്തും 58 പോയന്റുമായി തിരൂര്‍ ഫാത്തിമമാത മൂന്നാം സ്ഥാനത്തും നില്‍ക്കുന്നു.

നിമ..നിമ..നീഒന്നാം നമ്പര്‍

Posted on: 06 Dec 2012

ഒന്നാമത് മത്സരിക്കാന്‍ തയ്യാറാകാത്തവര്‍ നിമയെ കണ്ടുപഠിക്കണം. ഹയര്‍സെക്കന്‍ഡറി വിഭാഗം മോഹിനിയാട്ടം മത്സരത്തില്‍ നിമ ഒന്നാംനമ്പര്‍ ചോദിച്ചു വാങ്ങി കളിച്ചു. ഒന്നാംസ്ഥാനവും എ ഗ്രേഡും വാങ്ങി. ഒപ്പം വിധികര്‍ത്താക്കളുടെ പ്രശംസ വേറെയും. വേദി ഒന്നില്‍ ബുധനാഴ്ച വൈകീട്ടാണ് മോഹിനിയാട്ട മത്സരം തുടങ്ങിയത്. കലോത്സവത്തില്‍ പ്രത്യേകിച്ച് നൃത്ത ഇനങ്ങളില്‍ ഒന്നാമത് മത്സരിക്കാന്‍ മത്സരാര്‍ഥികള്‍ തയ്യാറാകാത്തതിനെത്തുടര്‍ന്ന് പല മത്സരങ്ങളും വൈകി നടക്കുന്നതിനിടെയാണ് നിമ ബഷീര്‍ മറിച്ചൊരു തീരുമാനമെടുത്തത്. ആദ്യം മത്സരിച്ചാല്‍ വിജയിയാകില്ലെന്ന വിശ്വാസമാണ് മത്സരാര്‍ഥികളെ പിന്തിരിപ്പിക്കുന്നത്. മമ്പാട് എം.ഇ.എസ് ഹയര്‍സെക്കന്‍ഡറി സ്‌കൂള്‍ വിദ്യാര്‍ഥിയാണ് നിമ.

വേങ്ങര മുന്നില്‍, പിന്നാലെ മലപ്പുറം

Posted on: 05 Dec 2012

മലപ്പുറം: നാടന്‍പാട്ടില്‍ നിന്ന് നടനമോഹനത്തിലേക്ക് കൂടുമാറിയ പകലില്‍ വിജയതീരം തേടി വേങ്ങരയുടെ വഞ്ചി വള്ളപ്പാടുകള്‍ മുന്നിലേക്ക്. ജില്ലാ സ്‌കൂള്‍ കലോല്‍സവത്തിന്റെ രണ്ടാം പകല്‍ ഒടുങ്ങുമ്പോള്‍ ഹൈസ്‌ക്കൂള്‍ വിഭാഗത്തില്‍ 148 പോയന്റുകളുമായാണ് വേങ്ങര മുന്നിലെത്തിയത്. 138 പോയന്റുകളുമായി മലപ്പുറം തൊട്ടുപിന്നില്‍ തുഴയുമ്പോള്‍ 109 പോയന്റുമായി ആതിഥേയരായ വണ്ടൂരാണ് മൂന്നാം സ്ഥാനത്ത്. ഹയര്‍ സെക്കണ്ടറി വിഭാഗത്തില്‍ 155 പോയന്റുകളുമായി മലപ്പുറം മുന്നേറുമ്പോള്‍ 148 പോയന്റുകള്‍ വീതം നേടി വേങ്ങരയും എടപ്പാളും തൊട്ടുപിന്നിലുണ്ട്. 129 പോയന്റുമായി മഞ്ചേരിയാണ് മൂന്നാം സ്ഥാനം. യു.പി.വിഭാഗത്തില്‍ 38 പോയന്റുകളുമായി കൊണ്ടോട്ടി മുന്നില്‍ നില്‍ക്കുമ്പോള്‍ 35 പോയന്റുകള്‍ വീതം നേടിയ വണ്ടൂരും തിരൂരും മഞ്ചേരിയും വെല്ലുവിളികളുമായി തൊട്ടുപിറകെയുണ്ട്.

ഹൈസ്‌കൂള്‍ വിഭാഗത്തില്‍ 46 പോയന്റുകളുമായി എടരിക്കോട് പി.കെ.എം.എച്ച്.എസ്.എസാണ് മുന്നില്‍ നില്‍ക്കുന്നത്. 40 പോയന്റുകളുമായി തിരൂര്‍ ഫാത്തിമ മാത സ്‌കൂള്‍ രണ്ടാമതും 38 പോയന്റുമായി തേഞ്ഞിപ്പലം സെന്റ് പോള്‍സ് മൂന്നാമതും നില്‍ക്കുന്നു. ഹയര്‍ സെക്കണ്ടറി വിഭാഗത്തില്‍ എടരിക്കോട് പി.കെ.എം.എച്ച്.എസ്.എസ് 55 പോയന്റുമായി മുന്നേറുമ്പോള്‍ മഞ്ചേരി ജി.ബി.എച്ച്.എച്ച്.എസ് 45 പോയന്റുമായി രണ്ടാം സ്ഥാനത്തുണ്ട്. 38 പോയന്റുള്ള പൊന്നാനി തൃക്കാവ് ഗവ.സ്‌ക്കൂളാണ് മൂന്നാം സ്ഥാനത്ത്.

സംസ്‌കൃതോല്‍സവത്തില്‍ 49 പോയന്റുകളുമായി പരപ്പനങ്ങാടി മുന്നില്‍ നില്‍ക്കുമ്പോള്‍ 47 പോയന്റുകളുമായി വേങ്ങര രണ്ടാം സ്ഥാനത്തും 46 പോയന്റുകളുമായി എടപ്പാള്‍ മൂന്നാം സ്ഥാനത്തുമുണ്ട്. അറബി കലോല്‍സവത്തില്‍ 55 പോയന്റുകളുമായി കൊണ്ടോട്ടി മുന്നില്‍ കുതിക്കുമ്പോള്‍ 53 പോയന്റുകളുമായി വണ്ടൂരും അരീക്കോടുമാണ് രണ്ടാം സ്ഥാനത്ത്.

വഞ്ചിപ്പാട്ടും നാടന്‍പാട്ടും അരങ്ങൊഴിഞ്ഞ രണ്ടാം പകലില്‍ നടന വിസ്മയങ്ങളുടെ മോഹന നിമിഷങ്ങളാണ് അരങ്ങില്‍ നിറഞ്ഞത്. ഭരതനാട്യവും കുച്ചുപ്പുടിയും കേരള നടനവും മികച്ച നിലവാരം പുലര്‍ത്തിയത് ആസ്വാദകര്‍ക്കും നല്ല വിരുന്നായി. ഹൈസ്‌ക്കൂള്‍ വിഭാഗം ഭരതനാട്യത്തില്‍ പങ്കെടുത്ത 19 പേരില്‍ 13 പേരും എ ഗ്രേഡ് നേടി. ഹയര്‍ സെക്കണ്ടറി വിഭാഗം ഭരതനാട്യത്തില്‍ പങ്കെടുത്ത 18ല്‍ 13 പേരും എ ഗ്രേഡ് നേടിയത് മല്‍സരത്തിന്റെ ഉന്നത നിലവാരത്തിന്റെ സാക്ഷ്യപത്രമായി.

ഓര്‍മകളുടെ ഒപ്പനവേദിയില്‍ ഒരിക്കല്‍ കൂടി

Posted on: 05 Dec 2012

വണ്ടൂര്‍: കാണികള്‍ തിങ്ങിനിറഞ്ഞ ഒപ്പനസദസ്സില്‍ നില്‍ക്കുമ്പോള്‍ അവരുടെ ഓര്‍മകള്‍ 34 വര്‍ഷം പിറകോട്ട് പാഞ്ഞു. അവിടെ ഇങ്ങനെയൊരു ഒപ്പനവേദിയില്‍ മണവാട്ടിയായും തോഴിമാരായും അവര്‍ തങ്ങളെ കണ്ടു. 1978ല്‍ വണ്ടൂരില്‍ ആദ്യത്തെ ജില്ലാ കലോത്സവം അരങ്ങേറിയപ്പോള്‍ ഒപ്പനയില്‍ ഒന്നാംസ്ഥാനം നേടിയ ടീമിലെ അംഗങ്ങളാണ് മൂന്ന് പതിറ്റാണ്ടിന് ശേഷം ഗൃഹാതുരമായ ഓര്‍മകളുമായി ഒപ്പന കാണാന്‍ എത്തിയത്.

അക്കൊല്ലം തൃശ്ശൂരില്‍ നടന്ന സംസ്ഥാന യുവജനോത്സവത്തിലും അവര്‍ക്കുതന്നെയായിരുന്നു ഒന്നാംസ്ഥാനം. അന്ന് വേദിയിലെത്തിയ സൂപ്പര്‍സ്റ്റാര്‍ പ്രേം നസീറിനോടൊപ്പം ഫോട്ടോ എടുക്കാന്‍ കഴിഞ്ഞതിന്റെ 'ത്രില്‍' ഇപ്പോഴും മാറിയിട്ടില്ല ഇവര്‍ക്ക്.

അന്നത്തെ മണവാട്ടിയായിരുന്ന ഒമ്പതാംക്ലാസുകാരി വി.കെ. സുഹ്‌റയ്ക്ക് ഇന്ന് വയസ്സ് 51. മണവാട്ടിയാക്കിയ കഥ ചോദിച്ചപ്പോള്‍ സുഹ്‌റത്താത്തയ്ക്ക് ചെറിയ നാണം. ജീവിതത്തില്‍ അവര്‍ നിലമ്പൂരിലെ ബിസിനസ്സുകാരനായ നാസറിന്റെ മണവാട്ടിയായി. പിന്നെ കുട്ടികളുടെ ഉമ്മയായി, ഉമ്മൂമ്മയായി...

മണവാട്ടി മാത്രമല്ല, ഏഴ് തോഴിമാരില്‍ ആറുപേരും ഒരുമിച്ചാണ് ഒപ്പനകാണാനെത്തിയത്. തോഴിമാരിലൊരാളായ നീലാമ്പ്ര ജുമൈല ഭര്‍ത്താവുമൊത്ത് ജിദ്ദയിലാണ്. ബാക്കിയുള്ള നെടുങ്കുളവന്‍ മൈമൂന, ചത്തോലി ആസ്യ, കാരാട്ടില്‍ സുബൈദ, ഏലാട്ടുപറമ്പില്‍ സീനത്ത്, കാരാട്ടില്‍ സൈനബ എന്നിവര്‍ പഴയമണവാട്ടിയോടൊപ്പമുണ്ടായിരുന്നു. കൂടെ അന്നത്തെ ഒപ്പന ഗുരുവായ തുറയ്ക്കല്‍ ആയിഷടീച്ചറും. വണ്ടൂര്‍ ബോയ്‌സ് ഹൈസ്‌കൂളിലെ ക്രാഫ്റ്റ് അധ്യാപികയായിരുന്ന ടീച്ചറാണ് ഇവര്‍ക്ക് ഒപ്പനച്ചുവടുകള്‍ പറഞ്ഞുകൊടുത്തത്. മാപ്പിള കലാകാരനായ ആസാദ് വണ്ടൂരാണ് ഇവരെ ഒരുമിച്ചു ചേര്‍ത്തത്.

പഴയ തോഴിമാര്‍ക്കെല്ലാം ഇപ്പോള്‍ പേരക്കുട്ടികളായി. ചിലര്‍ തമ്മില്‍ ഇപ്പോഴും സൗഹൃദം സൂക്ഷിക്കുന്നു. മറ്റുചിലര്‍ കുറേ കാലത്തിനുശേഷം ആദ്യമായി കാണുന്നു. അതിന്റെയൊരു സന്തോഷം എല്ലാവരുടെയും മുഖത്തുണ്ടായിരുന്നു.

പഴയ മണവാട്ടികളും തോഴിമാരും പുത്തന്‍ മണവാട്ടിയോടും തോഴിമാരോടും കുശലം പറഞ്ഞു.

തങ്ങള്‍ ജനിക്കുന്നതിനും എത്രയോമുമ്പ് ഒപ്പനയില്‍ സംസ്ഥാന ട്രോഫി വാങ്ങിയ ഇത്താത്തമാരെ കണ്ടപ്പോള്‍ പുതുതലമുറയ്ക്കും കൗതുകം. കുറേസമയം