ഓണപ്പരീക്ഷ ഓണം കഴിഞ്ഞ്
Published on 14 Jul 2012
തിരുവനന്തപുരം:
സ്‌കൂളുകളിലെ ഓണപരീക്ഷ ഇപ്രാവശ്യം ഓണം കഴിഞ്ഞേയുണ്ടാകൂ. സപ്തംബര്‍
ആദ്യയാഴ്ചയായിരിക്കും പരീക്ഷ. തീയതി തീരുമാനിച്ചിട്ടില്ല. വെള്ളിയാഴ്ച
ചേര്‍ന്ന ഗുണമേന്മാ പരിശോധനാ സമിതിയിലാണ് പരീക്ഷ ഓണം കഴിഞ്ഞ് നടത്തിയാല്‍
മതിയെന്ന് തീരുമാനമായത്.
സ്‌കൂള്‍ കലോത്സവത്തില്‍ നാല്
ഇനങ്ങള്‍ക്കൂടി ഇക്കുറി ഉള്‍പ്പെടുത്തും. വഞ്ചിപ്പാട്ട്, ചവിട്ടുനാടകം,
നാടന്‍പാട്ട്, നങ്ങ്യാര്‍കൂത്ത് എന്നിവയാണ് പുതിയഇനങ്ങള്‍.
അധ്യാപക
പരിശീലനം ജില്ലകളില്‍ ജൂലായ് 30 ന് തുടങ്ങും. ആദ്യഘട്ടമായി ജില്ലകളിലെ
അധ്യാപക സംഘടനാ നേതാക്കള്‍ക്കാണ് പരിശീലനം നല്‍കുക. ഉച്ചഭക്ഷണം
പരിപാടിക്കുള്ള ധനസഹായം വര്‍ദ്ധിപ്പിക്കുന്ന കാര്യം സര്‍ക്കാര്‍
പരിഗണിക്കും. 16 ന് ചേരുന്ന ഉന്നതതല യോഗത്തില്‍ ഇക്കാര്യം തീരുമാനിക്കും.
സ്‌കൂളുകളില്‍
അധ്യാപകരുടെ താത്കാലിക ഫിക്‌സേഷന്‍ നടത്താനും തത്വത്തില്‍ തീരുമാനമായി.
ഫിക്‌സേഷനെ തുടര്‍ന്ന് അധികമുള്ള അധ്യാപകരെ പരിശീലനത്തിന് അയക്കും.
പാഠപുസ്തകത്തിന്റെ രണ്ടാം ഭാഗം ഒക്ടോബര്‍ 15 നകം വിതരണം ചെയ്യും.
യോഗത്തില്‍
പൊതുവിദ്യാഭ്യാസ സെക്രട്ടറി എം. ശിവശങ്കര്‍, ഡി.പി.ഐ. എ. ഷാജഹാന്‍, സംഘടനാ
നേതാക്കളായ കെ. ഷാജഹാന്‍, കെ.എം. സുകുമാരന്‍, പി. ഹരിഗോവിന്ദന്, ജെ.ശശി,
സലാഹുദ്ദീന്‍, കെ. അബ്ദുള്‍ഖാദര്‍, എ.കെ. സൈനുദ്ദീന്‍, സിറിയക് കാവില്‍,
കെ. മുഹമ്മദ് എന്നിവര്‍ പങ്കെടുത്തു.
തിരുവനന്തപുരം:
ടീച്ചേഴ്സ് എലിജിബിലിറ്റി ടെസ്റ്റിന്‍െറ (ടെറ്റ്) അടിസ്ഥാന യോഗ്യതകള്‍
മാറ്റിയപ്പോള്‍ അപേക്ഷകരുടെ എണ്ണം കുത്തനെ വര്‍ധിച്ചു. മൂന്ന് വിഭാഗത്തിലും
ഒരേ അപേക്ഷകര്‍ ധാരാളമെത്തി. ഇതിനെത്തുടര്‍ന്ന് പരീക്ഷ മൂന്ന് ദിവസമായി
നടത്താന്‍ പരീക്ഷാഭവന്‍ തീരുമാനിച്ചു. അപേക്ഷാ സമയം ആഗസ്റ്റ ് രണ്ട് വരെ
നീട്ടിയിട്ടുണ്ട്.ആഗസ്റ്റ് 25ന് രാവിലെയും ഉച്ചക്കും വൈകുന്നേരവുമായി
എല്‍.പി, യു.പി, ഹൈസ്കൂള്‍ വിഭാഗങ്ങളുടെ പരീക്ഷ നടത്താനായിരുന്നു നേരത്തേ
വിജ്ഞാപനമിറക്കിയിരുന്നത്. ഇത് മാറ്റാനാണ് പുതിയ തീരുമാനം. പകരം ആഗസ്റ്റ്
25ന് എല്‍.പി വിഭാഗം പരീക്ഷ നടക്കും. യു.പി വിഭാഗം ടെറ്റ് ആഗസ്റ്റ് 27നാകും
നടക്കുക. സെപ്റ്റംബര്‍ ഒന്നിന് ഹൈസ്കൂള്‍ വിഭാഗത്തിന്‍െറ പരീക്ഷയും
നടക്കും. ഒരേ ഉദ്യോഗാര്‍ഥികള്‍ ഒന്നിലധികം വിഭാഗങ്ങളിലേക്ക്
അപേക്ഷിക്കുകയും ഇത്തരം അപേക്ഷകരുടെ എണ്ണം വര്‍ധിക്കുകയും
ചെയ്തതിനെത്തുടര്‍ന്നാണ് ഈ തീരുമാനം.നേരത്തേ ഏതെങ്കിലും ഒരു
വിഭാഗത്തിലേക്ക് അപേക്ഷിച്ചവര്‍ പുതിയ യോഗ്യത പ്രകാരം മറ്റ് വിഭാഗത്തിന്
അര്‍ഹരാണെങ്കില്‍ വീണ്ടും അപേക്ഷ നല്‍കണം. ഇവര്‍ പുതിയ ചെലാന്‍ അടച്ച്
അപേക്ഷിക്കണമെന്ന് പരീക്ഷാ ഭവന്‍ അറിയിച്ചു. ഇങ്ങനെ
അപേക്ഷിക്കുമ്പോഴുണ്ടാകുന്ന സാങ്കേതിക പ്രശ്നങ്ങള്‍ കൂടി പരിഹരിക്കാനായാണ്
പരീക്ഷ മൂന്ന് ദിവസമാക്കുന്നത്.
തിരുവനന്തപുരം:
പ്ലസ് വണ്‍ പ്രവേശനത്തിലെ ഏകജാലക പ്രവേശനത്തിലുള്ള പോരായ്മകളെക്കുറിച്ച്
പഠിച്ച് മാറ്റങ്ങള്‍ വരുത്തുമെന്ന് മുഖ്യമന്ത്രി ഉമ്മന്‍ചാണ്ടി നിയമസഭയില്‍
പറഞ്ഞു. എല്ലാ വിഷയങ്ങള്‍ക്കും എ പ്ലസ് നേടിയ കുട്ടിക്ക് അവര്‍
ആഗ്രഹിക്കുന്ന സ്‌കൂളില്‍ തന്നെ പ്രവേശനം നല്‍കണമെന്ന് നിര്‍ദേശം
നല്‍കിയിട്ടുണ്ടെന്നും അദ്ദേഹം വിശദീകരിച്ചു. ഇത്തരം കേസുകളില്‍ സീറ്റ്
ഇല്ലെങ്കില്‍ പ്രത്യേകമായി സീറ്റ് അനുവദിച്ച് പ്രവേശനം നല്‍കും. 
